Во просториите на Амбасадата на РСМ, како домаќин се реализира средба со Амбасадорот г. Данчо Марковски со кој се разговараше за работата и активностите на нашето ДКП во Тирана. Амбасадорот Марковски истакна дека Амбасадата во овој период освен билатерлните односи и редовните конзуларни работи, реализира повеќе проекти од областа на културата со цел зачувување на културниот и националниот идентитет на МНМ во Р. Aлбанија. 

На работниот ручек со поранешниот министер во Министерство за надворешни работи на Република Албанија, поранешен пратеник и актуелен Претседател на Либерално-демократскиот сојуз г. Ариан Старова, се разменија мислења и искуства во областа на дипломатијата а во тој контекст беа споменати и проблематики со кои се соочува нашата дијаспора.

Средбата со пратеникот и поранешен министер за дијаспора, г. Пандели Мајко беше од голема корист во однос на неговото искуство во областа на прашања од дијаспората, со цел обезбедување на најдобри и олеснувачки услуги за дијаспората.

Во Министерството за Европа и надворешни работи на Република Албанија, остварена е средба со г-ѓа Артемис Мало. На средбата се разменија мислења за понатамошната соработка меѓу двете држави во областа на дијаспората и македонското национално малцинство. 
Министерот Чупи информира за динамиката на соработката со дијаспората и нејзината важност воопшто за нашата држава, како и тоа дека се очекува донесување на закон за дијаспора, а со тоа се очекува и интензивирање на билатерална соработка за имплементација на потпишаниот Меморандум за соработка помеѓу двете држави.